الاولاد افضل فى حاجات والبنات افضل فى حاجات

استعرض الموضوع السابق استعرض الموضوع التالي اذهب الى الأسفل

الاولاد افضل فى حاجات والبنات افضل فى حاجات

مُساهمة من طرف A7mad Alkady في الأحد فبراير 17, 2008 4:16 pm

لا يوجد أكثر رومانسية من هذا المشهد..
قعدة على كافيتريا على النيل في وقت الغروب.. الجو لا هوّ حر بيخنق ولا برد بيتكتك.. والسنيورة اللي بتحبها قاعدة قدامك وانعكاس ضوء الشمس الخفيف على عيونها وأسنانها وهي بتضحك مخليينك تشعر وكأنك تملك كل ثروة "الوليد بن طلال" -20 مليار دولار بالمناسبة!- هو الشعور اللي خلاك تقول لها أحلى كلام.. وخلاك تعمل لها من كلمة "بحبك" وصفة سحرية خلتها مش متخيلة الحياة من غيرك هيكون شكلها إيه.. فل كده.. طيب والنبي يا "عبد العزيز" يا ابني انزل بالكاميرا "زووم إن" كده على الآخر خلينا نشوف المشهد ده هينتهي ازاي...

هي في سهوكة: يلاّ بقى اتأخرت.. احنا بقالنا 3 ساعات مع بعض.
هو في نحنحة: يعني خلاص هتمشي.. طيب هاعيش ازاي لغاية أما أشوفك الأسبوع الجاي؟!
هي: </span>تعيش أسبوع من غيري أحسن أما ماتعش خالص لو بابا عرف إني كنت معاك!
هو : مش تقولي كده من الأول يا شيخة!



يلوح بيده للجرسون ثم يكمل:
طيب "نحاسب" الأول.

يلمح الجرسون قادما إليه وهو يحمل في يده الفاتورة فينظر إليها وهو يقول مبتسما في خبث:
إيه يا حبيتي.. أنا باقول "نحاسب" مش "أحاسب" أظنك عارفاني طول عمري مش مغرور فمش باحب أتكلم عن نفسي بصيغة الجمع!
تنظر هي إليه في دهشة وهي تقول:
إنت أكيد بتهزر.. مش إنت اللي عازمني؟!
يبدأ صوته في الارتفاع دون أن ينتبه إلى أن الجرسون أصبح واقفا بجوارهما بالفعل:
عازمك.. مش إنت اللي قلت لي على المكان الغالي ده.. وأنا مالي يا أختي.. وبعدين فالحة بس تكلميني عن المساواة بين الرجل والمرأة.. وكل شوية تغني لي البنت زي الولد ماهيش كمالة عدد.. وتيجي وقت الدفع وتعملي فيها الليدي "ماكبث".. ده إنت ماطلعتيش كمالة عدد.. ده انت طلعت كمالة طبق كشري!.. عموما أنا هاحاسب المرة دي عشان الفضايح بس.. وأبقى راجل معفن لو رحت معاك في أماكن نضيفة تانية زي دي!



خلاص يا "عبد العزيز" كده المشهد خلص.. مش قلت لكم مافيش أكتر من كده رومانسية!
طبعا لا يحتاج الواحد فيكم أن يكون حاصلا على دبلومة في الجنتلة والإتيكيت والذوق العام من جامعة "هونولولو" ليدرك أن اللي عمله الأخ في المشهد اللي فوق ده مالهوش علاقة بأبسط قواعد اللياقة، وإنه بسلوكه الشاذ ده أفسد علاقته مع من يحب بشكل نهائي تقريبا -إلا إذا البنت طلعت راجل بقى ودفعت معاه الحساب!- بس برضه حتى نكون أمناء البنت غلطت في حاجة أو اتنين.. إيه هما؟ هنقول ده في التفاصيل اللي فيها حاجات تانية كتير مهمة للولد والبنت.. يا مسهل..


خليك جنتل مان.. مشيها جنتل!

خلينا نبدأ بالجنس الخشن أولا.. شوف يا سيد.. هو صحيح عم "صلاح جاهين" الله يرحمه قال على لسان "سعاد حسني" الله يرحمها برضه إن "البنت زي الولد ماهيش كمالة عدد" بس ده مش في كل حاجة طبعا.. يعني جو المساواة والفيفتي فيفتي "النص بالنص يعني للي مايعرفوش لغات!" ده ممكن يمشي ويقول مع واحد صاحبك.. مع زميلك في الشغل.. مع أخوك.. وممكن يمشي كمان مع واحدة زميلتك في الشغل.. بس ماينفعش وماتجيش خالص إنه يطبق برضه مع خطيبتك أو البنت اللي بتحبها.. يعني خليك جنتل مان "be A Gentele Man" للجماعة اللي بيدرسوا في مدارس لغات!".. وياريت تقول لي من فضلك لو مابقتش كده مع البنت اللي بتحبها هتبقى كده مع مين؟
ولاحظ إن سلوكك ده، يعني لو كنت إنسان لطيف وبتاخد بالك من الحاجات دي وبتحاسب على العزومة اللي إنت عازم عليها البنت، هي هتشعر إنك بتحبها فعلا وبتخاف عليها بجد وبتعاملها بشكل مختلف وله خصوصية، أما لو ده ماحصلش فالبنت هتشعر بإنها بالنسبة لك زيها زي عمك "توكل" اللي بتشتري منه الشيكولاتة.. بترتاح معاه آه وتتكلم معاه أحيانا وبتبقى مبسوط وإنت معاه بس في العادي يعني.. هتشعر إنك مش بتحبها وإنها زيها زي أي حد إنت تعرفه.. وكده يبقى باظ الموضوع يا أستاذ..
وبعدين لاحظ -الكلام هنا رجولي بحت بس مافيش مشاكل البنات تقراه ممكن يطلعوا برضه بحاجة كده ولا كده- إن العلاقة اللي بتجمع بينك وبينها مش المفروض إنها تكون محسوبة بالورقة والقلم فتقول لنفسك مثلا إنك عزمتها النهاردة على عزومة بخمسين جنيه يبقى هي الأسبوع الجاي لازم تجيب لك هدية بنفس تمن العزومة! ماتتحسبش كده.. المفروض تتحسب بكم الفرحة والشعور بالبهجة والرضا وإنت معاها سواء بقى إنت دفعت أغلب الوقت وسواء برضه هي جابت لك هدية كل فترة أو ماجابتش.. بس الأكيد إنه حتما ولابد هتيجيب لك هدية في يوم.. وصدقنا شعورك إنت بالهدية هيكون مختلف جدا وحلو جدا.. ولو رجعت للأول هتكتشف إن السبب في ده هو شعور البنت في الأول إنها بتحب واحد بيحبها -اللي هو حضرتك- واحد مش بخيل وبيحب يسعدها على قدر استطاعته.. في الوقت اللي بيتحول فيه الكلام ده جوه البنت من شعور إلى يقين بتبقى الحياة وردي جدا ليك وليها... والسبب في كل ده إيه؟ بالظبط.. إنك طلعت جنتل مان.. شفت بقى العملية سهلة وبسيطة ازاي؟!

ماتعملّيش فيها راجل!

بالنسبة للجنس اللطيف بقى خلينا نعترف إن فيه جزء كبير من البنات -أو هكذا نتمنى!- بيشعروا بحرج شديد لما تخرج الواحدة منهم مع خطيبها في خروجة حلوة ويعزمها على العشاء مثلا في مطعم فخم.. ممكن ييجي ليها شعور بالذنب وتشعر إنها بتحطه في موقف مالي أصعب من الموقف المالي للحكومة الانفصالية في مدغشقر!
ووالله دي مشاعر حلوة وطيبة.. وتبقى البنت بنت حلال بجد لو كان قلبها على جيب خطيبها زوج المستقبل.. بس برضه المفروض الأمر مايتحولش لـ"فوبيا" أو خوف مرضي على جيب الحبيب..

يعني خوفك عليه وحرصك على فلوسه مايخليكيش تعملي فيها سبع البرمبة "إيه البرمبة دي بالمناسبة؟!" أو تعملي فيها راجل.. الأمر اللي يخليكِ تحلفي يمين طلاق وإنت قاعدة معاه في المطعم إنك هتقسمي الحساب معاه.. كده غلط خالص.. ليه بقى؟.. أهو ده السؤال المتين.. ركزوا معايا:
لو عملت ده وصممتِ إن العلاقة بينك وبين من تحبين تمشي أمريكاني، النص بالنص يعني، صدقينا ده مش هيخليه مبسوط.. لأن الرجل بيكون في حاجة دائمة للشعور بأنه رجل.. طبعا الرجولة مش دفع فلوس "ولا هز أكتاف زي ما قال اللمبي!".. بس لما الرجل هو اللي بيكون عازمك على عزومة وهو اللي يدفع بيشعر من جواه بفرحة وانبساط شديدين، أولا لأنه معاك، وثانيا لأنه بيشعر إنك مسئولة منه، وثالثا لأنه بيشوف الفرحة في عينيك لما تكون معاه.
وعموما لو حبيتِ تشاركيه.. فيه طرق تانية كتير ممكن تعمليها من غير ما تحسسيه بإنك بتدفعي معاه الفلوس "عشان هو شحات ومش لاقي ياكل!".. إيه الطرق دي..

شوفي يا سيدتي.. إليك المقادير..

• ممكن تدفعي إنت مثلا فلوس التاكسي -لو رقاكِ يعني وركبك تاكسي!- أو إنك تدفعي أجرة الميكروباص اللي هيوديكم للمطعم.. أما بقى لو أصر إنه يوديك بأتوبيس نقل عام فسيبك منه خالص!.. بنهزر طبعا..

• حتى يا ستي لو رحت معاه في أتوبيس والجو كان خنقة وزحمة موت اوعي تظهري له قرفك وزهقك.. وحاولي دايما إنك تظهري له فرحتك لمجرد إنك معاه في أي مكان حتى ولو كان في أتوبيس نقل عام.




• وده اقتراح لطيف جدا... ممكن بعد العزومة الحلوة دي اللي دفع فيها هو دم قلبه وبقى ع الحديدة! إنك تشتري له هدية بعدها بفترة –لا طويلة عشان مايبقاش لها معنى ولا قصيرة عشان ماتظهرش وكأنها رد للدين- والهدايا كتير.. كرافت.. -أخ.. بيلبس جلابية على طول.. مايضرش هيبقى شكلها جنان على الجلابية برضه!- ممكن تجيبي كوفية صوف لو كنا في الشتاء.. أو محفظة من الجلد طبيعي.. أو ميدالية فضة.. أو البارفان اللي بيحبه.. ولو كنت مزنوقة ماديا والحالة كرب.. ماتشغليش بالك يا ستي.. 3 شرابات من الشباب الحلوين الموجودين في كل رصيف في مصر هتقضي الغرض.. والتلاتة بعشرة جنيه! القصد أن أبسط الأشياء أجملها.




• فيه حاجة كمان لازم سيادتك تاخدي بالك منها.. إنه مثلا لو الولد طلع كريم قوي وإنه بعد ما استلف من باباه 40 جنيه ميل على والدته واستلف منها 40 جنيه زيهم -عشان فيه كتاب نزل الجامعة ولازم أشتريه ضروري!- وعزمك بقى في مطعم فخيم من اللي بيطلعوا في التليفزيون.. مش لازم إنت كمان تعملي فيها "يسرا" وتطلبي أغلى ما في قائمة المطعم! خليك في الهادي.. في المتوسط اللذيذ.. كده يبقى قضيتم يوم حلو في مكان شيك وفي نفس الوقت هو هيحس إنك خايفة عليه وعلى فلوسه.




• وبرضه لو والده طلع ناصح ولم يعطِه سوى عشرة جنيه بس، ولو والدته فشلت أن تدبر له فلوس إضافية، واضطر لظروف مادية بحتة أن يعزمك على عربية فول عم "شكشكوك" الشهيرة، بلاش تظهري تأففك وضيقك من المكان اللي عازمك فيه.. واشكريه على الخروجة الحلوة.. وافتكري إنها فعلا ممكن بجد وبصدق تكون حلوة لو كنت من جواكِ راضية بيه وبتحبيه بجد، وإذا كان كل اللي يهمك إنك تكون جانبه ومعاه بس مش أكتر.



جربوا كده -ولاد وبنات- الوصفات دي اللي أساسها البساطة وعدم الفذلكة.. وقيام كل واحد منكم بدوره وبس مش أكتر.. يعني الولد ولد والبنت بنت..

حطوا الكلام ده حلقة في ودانكم.. لأنه كلام مش بتاعتنا احنا بس.. ده كلام قالته لينا الجدات.. افهموه وطبقوه وعمروا بيه البيوت..
avatar
A7mad Alkady
Professional
Professional

عدد الرسائل : 1120
العمر : 29
تاريخ التسجيل : 05/08/2007

معاينة صفحة البيانات الشخصي للعضو http://www.djtiesto.com

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف raghda_hassen في الأحد فبراير 17, 2008 4:36 pm


الموضوع لذيذ اووووى يا احمد مرسي
وبعدين مالها عربية فول عم "شكشكوك
avatar
raghda_hassen
Professional
Professional

عدد الرسائل : 1204
العمر : 27
البلد : Egypt
تاريخ التسجيل : 02/10/2007

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف A7mad Alkady في الأحد فبراير 17, 2008 4:46 pm

حلوه مش كدا!!!!
avatar
A7mad Alkady
Professional
Professional

عدد الرسائل : 1120
العمر : 29
تاريخ التسجيل : 05/08/2007

معاينة صفحة البيانات الشخصي للعضو http://www.djtiesto.com

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف tefa في الأحد فبراير 17, 2008 6:37 pm

اشطه يا مان علي الموضوع الحلو ده
وتحيا الرجالة
avatar
tefa
Professional
Professional

عدد الرسائل : 465
العمر : 28
البلد : مصر
تاريخ التسجيل : 04/08/2007

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف الياس العريقي في الأحد فبراير 17, 2008 7:05 pm

الموضوع جامد جداً جداً
يا قاضي ايوه كده اديلو
avatar
الياس العريقي
amateur
amateur

عدد الرسائل : 334
العمر : 28
البلد : اليمن
تاريخ التسجيل : 10/12/2007

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف dena1 في الأربعاء فبراير 20, 2008 6:15 pm

شكرا على الموضوع
avatar
dena1
Professional
Professional

عدد الرسائل : 1069
العمر : 28
تاريخ التسجيل : 08/10/2007

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف A7mad Alkady في الأربعاء فبراير 20, 2008 7:28 pm

شكرا يا جماعه علي ردودكم الحلوه والتشجيع الجميل دا
وفعلا لو كل واحد فينا اهتم بحبيبه او حبيبته وهما كمان خافوا علي مصلحه بعض اكيد علاقتهم هتكون ناجحه وهاتستمر
avatar
A7mad Alkady
Professional
Professional

عدد الرسائل : 1120
العمر : 29
تاريخ التسجيل : 05/08/2007

معاينة صفحة البيانات الشخصي للعضو http://www.djtiesto.com

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف nouny elkahkey في الخميس فبراير 21, 2008 5:50 am

جاااااااااااااااااااامد جداااا يا قاضي بجد روعه

nouny elkahkey
New Step
New Step

عدد الرسائل : 13
تاريخ التسجيل : 12/02/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف A7mad Alkady في الخميس فبراير 21, 2008 5:31 pm

ميرسيي يا نوران علي ردك الجميل
avatar
A7mad Alkady
Professional
Professional

عدد الرسائل : 1120
العمر : 29
تاريخ التسجيل : 05/08/2007

معاينة صفحة البيانات الشخصي للعضو http://www.djtiesto.com

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف mohamedibraheem في السبت فبراير 23, 2008 1:13 am

ميرسي يا قاضي علي الموضوع الجامد بس قولي بالمناسبه دي عربيتك اللي في الصوره بس دهنتها ازرق
avatar
mohamedibraheem
amateur
amateur

عدد الرسائل : 334
العمر : 27
تاريخ التسجيل : 02/10/2007

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف A7mad Alkady في السبت فبراير 23, 2008 3:04 pm

لا والله يا محمد لسه
بسس التظبيط دا عجبني اوي وبفكر اعمله
avatar
A7mad Alkady
Professional
Professional

عدد الرسائل : 1120
العمر : 29
تاريخ التسجيل : 05/08/2007

معاينة صفحة البيانات الشخصي للعضو http://www.djtiesto.com

الرجوع الى أعلى الصفحة اذهب الى الأسفل

رد: الاولاد افضل فى حاجات والبنات افضل فى حاجات

مُساهمة من طرف جنى في الأربعاء مارس 26, 2008 7:37 pm

شكرا اوى على الموضوع ده بجد جميل بس اهم حاجه نعمل بيه مش نقرأه وبس
avatar
جنى
New Step
New Step

عدد الرسائل : 23
تاريخ التسجيل : 17/03/2008

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى